---
title: "നായനാരുടെയും ചടയന്‍ ഗോവിന്ദൻ്റെയും 'നടുവിൽ' കോടിയേരിക്ക് അന്ത്യനിദ്ര, സ്മൃതിമണ്ഡപവും പണിയും"
english_title: "funeral-of-kodiyeri-balakrishnan-to-held-in-payyambalam-sea-shore"
publisher: "thaliparambanews.in"
canonical_url: "https://thaliparamba.truevisionnews.com/news/72211/funeral-of-kodiyeri-balakrishnan-to-held-in-payyambalam-sea-shore"
published_at: "2022-10-03T05:58:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/633a2d9e3d8d0_kodiyeri-balakrishnan-funeral-payyambalam-94604942.jpg"
keywords: []
---

# നായനാരുടെയും ചടയന്‍ ഗോവിന്ദൻ്റെയും 'നടുവിൽ' കോടിയേരിക്ക് അന്ത്യനിദ്ര, സ്മൃതിമണ്ഡപവും പണിയും

> **Lead Summary:** കണ്ണൂര്‍: കേരള ചരിത്രത്തില്‍ വ്യക്തിമുദ്ര പതിപ്പിച്ച മഹാന്മാര്‍ അന്ത്യവിശ്രമം കൊള്ളുന്ന പയ്യാമ്പലം കടല്‍ത്തീരത്ത് പ്രിയനേതാവിന് അന്ത്യനിദ്ര.

## Article Content

കണ്ണൂര്‍: കേരള ചരിത്രത്തില്‍ വ്യക്തിമുദ്ര പതിപ്പിച്ച മഹാന്മാര്‍ അന്ത്യവിശ്രമം കൊള്ളുന്ന പയ്യാമ്പലം കടല്‍ത്തീരത്ത് പ്രിയനേതാവിന് അന്ത്യനിദ്ര.

കേരളത്തിൻ്റെ ജനനായകനും മുന്‍ മുഖ്യമന്ത്രിയുമായിരുന്ന ഇ കെ നായനാരുടെയും മുന്‍ സംസ്ഥാന സെക്രട്ടറി ചടയന്‍ ഗോവിന്ദൻ്റെയും സ്മൃതികുടീരങ്ങള്‍ക്ക് നടുവിലായാണ് കോടിയേരിക്ക് ചിതയൊരുക്കുക. ഇരുവരും പാര്‍ട്ടി സംസ്ഥാന സെക്രട്ടറിമാരായിരുന്നു.

ഇവിടെ കോടിയേരിക്കായി സ്മൃതിമണ്ഡപവും പണിയും. അഴീക്കോടന്‍ രാഘവൻ്റെ രക്തസാക്ഷികുടീരവും എ കെ ജിയുടേയും സുകുമാര്‍ അഴീക്കോടിൻ്റെയും എന്‍ സി ശേഖറിൻ്റെയും സ്വദേശാഭിമാനി രാമകൃഷ്ണപിള്ള ഉള്‍പ്പെടെയുള്ളവരുടെ സ്മൃതികുടീരങ്ങള്‍ സമീപത്തുണ്ട്.

ഇവിടെ സംസ്‌കാരച്ചടങ്ങുകള്‍ക്കായി വലിയ പന്തലുയര്‍ന്നു.

 പയ്യാമ്പലം പാര്‍ക്കിലെ ഓപ്പണ്‍ സ്റ്റേജിലാണ് അനുശോചനയോഗം ചേരുക. ഇവിടെയും പന്തല്‍ നിര്‍മിച്ചിട്ടുണ്ട്. കോടിയേരിക്ക് അന്തിമോപചാരം അര്‍പ്പിക്കാന്‍ പതിനായിരങ്ങള്‍ തിങ്കളാഴ്ച കണ്ണൂര്‍ നഗരത്തിലെത്തുമെന്നാണ് പ്രതീക്ഷിക്കുന്നത്. സംസ്‌കാരത്തിന് ശേഷം നടക്കുന്ന അനുശോചനയോഗത്തില്‍ സിപിഐഎം ജനറല്‍ സെക്രട്ടറി സീതാറാം യെച്ചൂരി, പൊളിറ്റ് ബ്യൂറോ അംഗം പ്രകാശ് കാരാട്ട്, മുഖ്യമന്ത്രി പിണറായി വിജയന്‍, പാര്‍ട്ടി സംസ്ഥാന സെക്രട്ടറി എം വി ഗോവിന്ദന്‍ ഉള്‍പ്പെടെയുള്ള നേതാക്കള്‍ പങ്കെടുക്കും.

### Related Links & Sources
- [Original Story Source](https://thaliparamba.truevisionnews.com/news/72211/funeral-of-kodiyeri-balakrishnan-to-held-in-payyambalam-sea-shore)