---
title: "കളഞ്ഞു കിട്ടിയ മാല ബാങ്ക് മാനേജരുടെ ഭാര്യയുടേത്: 11 ദിവസത്തെ കാത്തിരിപ്പിനൊടുവിൽ നാലര പവന്റെ മാലയുമായി അശ്വതി മടങ്ങി"
english_title: "Bank manager's wife loses necklace"
publisher: "thaliparambanews.in"
canonical_url: "https://thaliparamba.truevisionnews.com/news/38944/bank-managers-wife-loses-necklace"
published_at: "2022-04-23T16:33:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6263dd1fb0bb0_vac.jpg"
keywords: []
---

# കളഞ്ഞു കിട്ടിയ മാല ബാങ്ക് മാനേജരുടെ ഭാര്യയുടേത്: 11 ദിവസത്തെ കാത്തിരിപ്പിനൊടുവിൽ നാലര പവന്റെ മാലയുമായി അശ്വതി മടങ്ങി

> **Lead Summary:** **പയ്യന്നൂര്‍:** വഴിയാത്രക്കാരന് കളഞ്ഞുകിട്ടിയ നാലര പവനോളം തൂക്കമുള്ള താലിമാലയുടെ ഉടമ ദിവസങ്ങള്‍ക്ക് ശേഷം ഒടുവില്‍ പയ്യന്നൂര്‍ പോലീസ് സ്‌റ്റേഷനിലെത്തി. കടന്നപ്പള്ളി ചെറുവാച്ചേരിയിലെ കാനറ ബാങ്ക് മാനേജരുടെ ഭാര്യ അശ്വതിയാണ് പതിനൊന്ന് ദിവസം മുമ്പ് നഷ്ടപ്പെട്ട താലിമാല തേടി ഒടുവില്‍ ഇന്നലെ വൈകുന്നേരത്തോടെ പയ്യന്നൂര്‍ പോലീസിലെത്തിയത്.

## Article Content

**പയ്യന്നൂര്‍:** വഴിയാത്രക്കാരന് കളഞ്ഞുകിട്ടിയ നാലര പവനോളം തൂക്കമുള്ള താലിമാലയുടെ ഉടമ ദിവസങ്ങള്‍ക്ക് ശേഷം ഒടുവില്‍ പയ്യന്നൂര്‍ പോലീസ് സ്‌റ്റേഷനിലെത്തി. കടന്നപ്പള്ളി ചെറുവാച്ചേരിയിലെ കാനറ ബാങ്ക് മാനേജരുടെ ഭാര്യ അശ്വതിയാണ് പതിനൊന്ന് ദിവസം മുമ്പ് നഷ്ടപ്പെട്ട താലിമാല തേടി ഒടുവില്‍ ഇന്നലെ വൈകുന്നേരത്തോടെ പയ്യന്നൂര്‍ പോലീസിലെത്തിയത്.

പൊട്ടിപ്പോയ താലിമാല ബാഗില്‍ സൂക്ഷിച്ചതായിരുന്നു. സഹോദരന്‍ ദിലീപിനൊപ്പം സ്‌കൂട്ടറില്‍ പെരുമ്പയിലെത്തിയതായിരുന്നു അവര്‍. ബാഗില്‍ നിന്ന് സാധനങ്ങള്‍ എടുക്കുന്നതിനിടെ താഴേക്ക് റോഡരികില്‍ വീണ നാലര പവന്റെ താലിമാല ശ്രദ്ധയില്‍പ്പെട്ടില്ലെന്ന് അശ്വതി പറയുന്നു.

ഇക്കഴിഞ്ഞ 12 നാണ് പെരുമ്പ കെഎസ്ആര്‍ടിസി ഡിപ്പോക്ക് സമീപം വച്ച് വെള്ളൂര്‍ ഏച്ചിലാംവയലിലെ കൊഴുമ്മല്‍വീട്ടില്‍ അനില്‍കുമാറിന് താലി മാല വീണു കിട്ടിയത്. ഉടമയെ തെരഞ്ഞെങ്കിലും കണ്ടെത്താനാകാത്തതിനെ തുടര്‍ന്ന് 20ന് പയ്യന്നൂര്‍ പോലിസില്‍ ഏല്‍പിക്കുകയായിരുന്നു. സഹോദരനൊപ്പം സമീപത്തെ സ്റ്റേഷനറി കടയിലെത്തിയ കുടുംബം ബലൂണും മറ്റും വാങ്ങി പുറത്തിറങ്ങി യമഹ സ്‌കൂട്ടറില്‍ കയറുന്നതിനിടയില്‍ വീണുപോയതാണ്.

സമൂഹമാധ്യമങ്ങളിലടക്കം ഈ ദൃശ്യങ്ങള്‍ വ്യാപകമായി പ്രചരിച്ചിരുന്നെങ്കിലും മാല തേടി ഉടമ എത്താന്‍ വൈകി. തുടര്‍ന്ന് നിരീക്ഷണ ക്യാമറാ ദൃശ്യത്തില്‍ പതിഞ്ഞ യുവാവിനെ വിളിച്ചു വരുത്തിയപ്പോഴാണ് ദിവസങ്ങളായി തേടി നടന്ന താലി മാലയുടെ ഉടമയെ കണ്ടെത്താനായത്.

പയ്യന്നൂര്‍ ഡിവൈഎസ്പി കെഇ പ്രേമചന്ദ്രന്‍, എസ്ഐഎന്‍കെ ഗിരീഷ് എന്നിവരുടെ സാന്നിധ്യത്തില്‍ നാലര പവന്റെ താലിമാല കളഞ്ഞുകിട്ടിയ അനില്‍ കുമാര്‍ ഉടമയ്ക്ക്‌ കൈമാറി. അനില്‍ കുമാറിനെ അഭിനന്ദിക്കാനും പോലീസ് മറന്നില്ല.

### Related Links & Sources
- [Original Story Source](https://thaliparamba.truevisionnews.com/news/38944/bank-managers-wife-loses-necklace)