---
title: "മലിനജലം ഒഴുക്കിയ മിനി ലോറിക്ക് 5000 രൂപ പിഴ ചുമത്തി എൻഫോഴ്സ്മെന്റ് സ്‌ക്വാഡ്"
english_title: "Enforcement squad imposes ₹5,000 fine on mini-lorry for discharging wastewater."
publisher: "thaliparambanews.in"
canonical_url: "https://thaliparamba.truevisionnews.com/news/374775/enforcement-squad-imposes-5000-fine-on-mini-lorry-for-discharging-wastewater"
published_at: "2026-07-26T21:47:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a66333adc830_1000732235.jpg"
keywords: []
---

# മലിനജലം ഒഴുക്കിയ മിനി ലോറിക്ക് 5000 രൂപ പിഴ ചുമത്തി എൻഫോഴ്സ്മെന്റ് സ്‌ക്വാഡ്

> **Lead Summary:** തദ്ദേശ സ്വയംഭരണ വകുപ്പിൻറെ ജില്ലാ എൻഫോഴ്സ്മെന്റ്സ് സ്ക്വാഡ് മലിനജലം റോഡിൽ ഒഴുക്കിക്കൊണ്ട് സഞ്ചരിച്ച മിനി ലോറിക്ക് പിഴ ചുമത്തി.

## Article Content

തദ്ദേശ സ്വയംഭരണ വകുപ്പിൻറെ ജില്ലാ എൻഫോഴ്സ്മെന്റ്സ് സ്ക്വാഡ് മലിനജലം റോഡിൽ ഒഴുക്കിക്കൊണ്ട് സഞ്ചരിച്ച മിനി ലോറിക്ക് പിഴ ചുമത്തി.

തലശ്ശേരിയിൽ നിന്ന് മത്സ്യവുമായി വന്ന കെ എൽ 58 ക്യൂ 80 43 ബൊലേറോ മിനിലോറിയുടെ ഉടമ സി.കെ സുനീറിനാണ് പഞ്ചായത്തീരാജ് അനുസരിച്ച് പിഴ ചുമത്തിയത്.അനുവദനീയമായതിലും കൂടുതൽ ഉയരത്തിൽ മീൻ പെട്ടികൾ അടുക്കി വച്ച് മലിനജലം ഒഴുക്കി കൊണ്ടുള്ള ലോറിയുടെ വീഡിയോ സഹിതമാണ് തദ്ദേശസ്വയംഭരണ വകുപ്പിന്റെ ജില്ലാ എൻഫോഴ്സ്മെൻ്റ് സ്‌ക്വാഡിന് പരാതി ലഭിച്ചത്.

നിയമലംഘനം നടന്നത് പെരളശ്ശേരി പഞ്ചായത്തിന്റെ പരിധിയിൽ ആയതിനാൽ പഞ്ചായത്തീരാജ് ആക്ട് 219 (കെ)അനുസരിച്ച് 5000 രൂപ പിഴ ചുമത്തി തുടർനടപടികൾ സ്വീകരിക്കാൻ പെരളശ്ശേരി ഗ്രാമപഞ്ചായത്ത് സെക്രട്ടറിക്ക് സ്‌ക്വാഡ് നിർദ്ദേശം നൽകി.മലിനജലം ഒഴുക്കി വിടൽ,മാലിന്യം വലിച്ചെറിയൽ,നിരോധിത പ്ലാസ്റ്റിക് ക്യാരിബാഗുകളുടെ വിൽപ്പനയും ഉപയോഗവും തുടങ്ങിയ നിയമലംഘനങ്ങൾ ശ്രദ്ധയിൽപ്പെട്ടാൽ പൊതുജനങ്ങൾക്ക് *9446 700 800* എന്ന നമ്പറിൽ തെളിവ് സഹിതം പരാതി നൽകാവുന്നതാണ്.

പിഴയുടെ 25 ശതമാനം തുക വിവരം നൽകുന്നവർക്ക് പാരിതോഷികമായി ലഭിക്കും.

### Related Links & Sources
- [Original Story Source](https://thaliparamba.truevisionnews.com/news/374775/enforcement-squad-imposes-5000-fine-on-mini-lorry-for-discharging-wastewater)