---
title: "ലഹരിക്കെതിരെ കണ്ണൂർ സിറ്റി പോലീസിന്റെ വാക്കത്തോൺ; മന്ത്രി രമേശ് ചെന്നിത്തല ഉദ്ഘാടനം ചെയ്തു"
english_title: "Kannur City Police's walkathon against drugs; Minister Ramesh Chennithala inaugurated the event."
publisher: "thaliparambanews.in"
canonical_url: "https://thaliparamba.truevisionnews.com/news/373242/kannur-city-polices-walkathon-against-drugs-minister-ramesh-chennithala-inaugurated-the-event"
published_at: "2026-07-18T18:49:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a5b7d5828098_news-card.jpg"
keywords: []
---

# ലഹരിക്കെതിരെ കണ്ണൂർ സിറ്റി പോലീസിന്റെ വാക്കത്തോൺ; മന്ത്രി രമേശ് ചെന്നിത്തല ഉദ്ഘാടനം ചെയ്തു

> **Lead Summary:** കണ്ണൂർ: ലഹരി വിരുദ്ധ പോരാട്ടത്തിൽ ജനങ്ങളെ അണിനിരത്തി കണ്ണൂർ സിറ്റി പോലീസിന്റെ വാക്കത്തോണും വിപുലമായ ബോധവൽക്കരണ പരിപാടികളും സംഘടിപ്പിച്ചു. കേരളാ പോലീസിന്റെ 'ഓപ്പറേഷൻ തൂഫാൻ - ദി നാർക്കോ ഹണ്ട്' എന്ന ലഹരി വിരുദ്ധ ദൗത്യത്തിന്റെ ഭാഗമായാണ് പരിപാടികൾ. ജൂലൈ 18 ശനിയാഴ്ച രാവിലെ 9.30-ന് കണ്ണൂർ പോലീസ് പരേഡ് ഗ്രൗണ്ടിൽ നടന്ന ചടങ്ങിൽ ആഭ്യന്തര വകുപ്പ് മന്ത്രി രമേശ് ചെന്നിത്തല ലഹരി വിരുദ്ധ യജ്ഞത്തിന്റെ ഉദ്ഘാടനം നിർവഹിച്ചു.

## Article Content

കണ്ണൂർ: ലഹരി വിരുദ്ധ പോരാട്ടത്തിൽ ജനങ്ങളെ അണിനിരത്തി കണ്ണൂർ സിറ്റി പോലീസിന്റെ വാക്കത്തോണും വിപുലമായ ബോധവൽക്കരണ പരിപാടികളും സംഘടിപ്പിച്ചു. കേരളാ പോലീസിന്റെ 'ഓപ്പറേഷൻ തൂഫാൻ - ദി നാർക്കോ ഹണ്ട്' എന്ന ലഹരി വിരുദ്ധ ദൗത്യത്തിന്റെ ഭാഗമായാണ് പരിപാടികൾ. ജൂലൈ 18 ശനിയാഴ്ച രാവിലെ 9.30-ന് കണ്ണൂർ പോലീസ് പരേഡ് ഗ്രൗണ്ടിൽ നടന്ന ചടങ്ങിൽ ആഭ്യന്തര വകുപ്പ് മന്ത്രി രമേശ് ചെന്നിത്തല ലഹരി വിരുദ്ധ യജ്ഞത്തിന്റെ ഉദ്ഘാടനം നിർവഹിച്ചു.

ലഹരിക്കെതിരായ പോരാട്ടത്തിൽ പൊതുജനങ്ങളെ പങ്കാളികളാക്കുക എന്ന ലക്ഷ്യത്തോടെയാണ് പരിപാടികൾ സംഘടിപ്പിച്ചത്. ചടങ്ങിൽ മന്ത്രി 'തൂഫാൻ' പതാക ഉയർത്തി.

തലശ്ശേരി അസിസ്റ്റന്റ് സൂപ്രണ്ട് ഓഫ് പോലീസ് ഡോ. നന്ദഗോപൻ എം. ഐ.പി.എസ് സ്വാഗതം ആശംസിച്ച ചടങ്ങിൽ കണ്ണൂർ എം.എൽ.എ അഡ്വ. ടി.ഒ. മോഹനൻ, അഴീക്കോട് എം.എൽ.എ കെ.വി. സുമേഷ്, കഥാകൃത്ത് ടി. പത്മനാഭൻ എന്നിവർ ആശംസാ പ്രസംഗം നടത്തി.

ലഹരിക്കെതിരായ പ്രതിജ്ഞ കണ്ണൂർ സിറ്റി പോലീസ് കമ്മീഷണർ ബി.വി. വിജയ ഭരത് റെഡ്ഡി ഐ.പി.എസ് ചൊല്ലിക്കൊടുത്തു. തുടർന്ന് ലഹരി വിരുദ്ധ സിഗ്നേച്ചർ ക്യാമ്പയിന്റെ ഉദ്ഘാടനവും വാക്കത്തോണിന്റെ ഫ്ലാഗ് ഓഫും മന്ത്രി നിർവഹിച്ചു.

പരേഡ് ഗ്രൗണ്ടിൽ നിന്ന് ആരംഭിച്ച വാക്കത്തോൺ കാൽടെക്സ്, ഗാന്ധി സർക്കിൾ, ട്രാഫിക് പോലീസ് സ്റ്റേഷൻ വഴി ജവഹർ സ്റ്റേഡിയത്തിൽ സമാപിച്ചു.

വിദ്യാർഥികൾ, സന്നദ്ധ സംഘടനകൾ, പോലീസ് ഉദ്യോഗസ്ഥർ ഉൾപ്പെടെ നൂറുകണക്കിന് പേർ വാക്കത്തോണിൽ പങ്കെടുത്തു.

ചടങ്ങിൽ ജില്ലാ പഞ്ചായത്ത് പ്രസിഡന്റ് അഡ്വ. ബിനോയ് കുര്യൻ, ഉത്തര മേഖല ഐ.ജി പുട്ട വിമലാദിത്യ ഐ.പി.എസ്, ജില്ലാ കളക്ടർ പി. വിഷ്ണുരാജ് ഐ.എ.എസ്, അസിസ്റ്റന്റ് കളക്ടർ എസ്. സ്വാതി ഐ.എ.എസ്, ഡെപ്യൂട്ടി ഡയറക്ടർ ഓഫ് എഡ്യൂക്കേഷൻ ഡി. ഷൈനി തുടങ്ങിയവർ സന്നിഹിതരായിരുന്നു.

### Related Links & Sources
- [Original Story Source](https://thaliparamba.truevisionnews.com/news/373242/kannur-city-polices-walkathon-against-drugs-minister-ramesh-chennithala-inaugurated-the-event)