---
title: "പയ്യന്നൂരിലെ ഒന്നര വയസ്സുകാരന്റെ മരണം: പ്രത്യേക അന്വേഷണസംഘത്തെ നിയോഗിക്കണമെന്ന് ആവശ്യം, പിതാവ് ആഭ്യന്തരമന്ത്രിയെ കണ്ടു "
english_title: " Toddler Death: Father Suresh Meets Home Minister Chennithala, Demands Special Probe"
publisher: "thaliparambanews.in"
canonical_url: "https://thaliparamba.truevisionnews.com/news/373120/toddler-death-father-suresh-meets-home-minister-chennithala-demands-special-probe"
published_at: "2026-07-18T10:47:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a5b0ca6e9602_1000710003.jpg"
keywords: []
---

# പയ്യന്നൂരിലെ ഒന്നര വയസ്സുകാരന്റെ മരണം: പ്രത്യേക അന്വേഷണസംഘത്തെ നിയോഗിക്കണമെന്ന് ആവശ്യം, പിതാവ് ആഭ്യന്തരമന്ത്രിയെ കണ്ടു 

> **Lead Summary:** പയ്യന്നൂർ: ഒന്നര വയസ്സുകാരന്റെ ദുരൂഹ മരണത്തിൽ കുടുംബം ആഭ്യന്തരമന്ത്രി രമേശ് ചെന്നിത്തലയെ കണ്ടു. കേസന്വേഷണം ഊർജ്ജിതപ്പെടുത്തണമെന്നും പ്രത്യേക അന്വേഷണസംഘത്തെ നിയോഗിക്കണമെന്നും പിതാവ് സൂരജ് ആവശ്യപ്പെട്ടു.

## Article Content

പയ്യന്നൂർ: ഒന്നര വയസ്സുകാരന്റെ ദുരൂഹ മരണത്തിൽ കുടുംബം ആഭ്യന്തരമന്ത്രി രമേശ് ചെന്നിത്തലയെ കണ്ടു. കേസന്വേഷണം ഊർജ്ജിതപ്പെടുത്തണമെന്നും പ്രത്യേക അന്വേഷണസംഘത്തെ നിയോഗിക്കണമെന്നും പിതാവ് സൂരജ് ആവശ്യപ്പെട്ടു.

കേസന്വേഷണത്തിൽ നിലവിൽ തൃപ്തിയുണ്ടെന്നും എന്നാൽ കൂടുതൽ കാര്യക്ഷമമായ അന്വേഷണം വേണമെന്നും സൂരജ് മന്ത്രിയോട് പറഞ്ഞു. അഞ്ജലി പൊതുവാളിന് പുറമേ ഡോ. ആരതി അന്തർജനം, ഡോ. ആശാ നിർമ്മൽ എന്നീ ഡോക്ടർമാരെയും കേസിൽ പ്രതി ചേർക്കണമെന്ന് കുടുംബം ആവശ്യപ്പെട്ടു.

സർക്കാരിലും പോലീസിലും പൂർണ്ണ വിശ്വാസമുണ്ടെന്ന് വ്യക്തമാക്കിയ സൂരജ്, ഇനി ഒരു കുട്ടിക്കും ഇത്തരത്തിലുള്ള ദുരനുഭവം ഉണ്ടാകരുതെന്നും പറഞ്ഞു. സംഭവത്തിൽ കർശന നടപടി വേണമെന്നും കുറ്റക്കാർ ശിക്ഷിക്കപ്പെടണമെന്നും അദ്ദേഹം ആവശ്യപ്പെട്ടു.

കുടുംബത്തിന്റെ ആവശ്യങ്ങൾ പരിഗണിക്കുമെന്ന് മന്ത്രി ചെന്നിത്തല ഉറപ്പ് നൽകിയതായാണ് വിവരം. സംഭവത്തിൽ നേരത്തെ കേസ് രജിസ്റ്റർ ചെയ്ത് അന്വേഷണം പുരോഗമിക്കുകയാണ്.

ഒന്നര വയസ്സുകാരന്റെ മരണം നാട്ടിൽ വലിയ പ്രതിഷേധത്തിന് വഴിവെച്ചിരുന്നു. മെഡിക്കൽ അനാസ്ഥ ആരോപിച്ചാണ് ബന്ധുക്കളും നാട്ടുകാരും പ്രതിഷേധവുമായി രംഗത്തെത്തിയത്.

### Related Links & Sources
- [Original Story Source](https://thaliparamba.truevisionnews.com/news/373120/toddler-death-father-suresh-meets-home-minister-chennithala-demands-special-probe)