---
title: "ദിവസങ്ങൾക്കുള്ളിൽ മയക്കുമരുന്ന് കേസ് തെളിയിച്ച പി പി സദാനന്ദന് സ്ഥാനക്കയറ്റം"
english_title: "pp sadanandan promotion"
publisher: "thaliparambanews.in"
canonical_url: "https://thaliparamba.truevisionnews.com/news/34180/pp-sadanandan-promotion"
published_at: "2022-03-27T11:36:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/623ffedde6d87_vac.jpg"
keywords: []
---

# ദിവസങ്ങൾക്കുള്ളിൽ മയക്കുമരുന്ന് കേസ് തെളിയിച്ച പി പി സദാനന്ദന് സ്ഥാനക്കയറ്റം

> **Lead Summary:** **കണ്ണൂര്‍: **കണ്ണൂര്‍ മയക്കുമരുന്ന് കേസ് ശാസ്ത്രീയമായ അന്വേഷണത്തിലൂടെ തെളിയിക്കുകയും നൈജീരിയന്‍ സ്വദേശിനിയുള്‍പ്പെടെയുള്ള മുഖ്യകണ്ണികളെ പിടികൂടുകയും ചെയ്ത കണ്ണൂര്‍ അസിസ്റ്റന്‍റ് സിറ്റി പൊലീസ് കമ്മീഷണര്‍ പി.പി സദാനന്ദനെ തേടിയെത്തിയത് സ്ഥാനക്കയറ്റം. കണ്ണൂര്‍ സിറ്റി എ.സി.പിയായിരുന്ന പി.പി സദാനന്ദന്‍ ഇനി അഡീഷനല്‍ എസ്.പിയായാണ് പ്രവര്‍ത്തിക്കുക.

## Article Content

**കണ്ണൂര്‍: **കണ്ണൂര്‍ മയക്കുമരുന്ന് കേസ് ശാസ്ത്രീയമായ അന്വേഷണത്തിലൂടെ തെളിയിക്കുകയും നൈജീരിയന്‍ സ്വദേശിനിയുള്‍പ്പെടെയുള്ള മുഖ്യകണ്ണികളെ പിടികൂടുകയും ചെയ്ത കണ്ണൂര്‍ അസിസ്റ്റന്‍റ് സിറ്റി പൊലീസ് കമ്മീഷണര്‍ പി.പി സദാനന്ദനെ തേടിയെത്തിയത് സ്ഥാനക്കയറ്റം. കണ്ണൂര്‍ സിറ്റി എ.സി.പിയായിരുന്ന പി.പി സദാനന്ദന്‍ ഇനി അഡീഷനല്‍ എസ്.പിയായാണ് പ്രവര്‍ത്തിക്കുക.

കണ്ണൂര്‍ സിറ്റി അഡീഷനല്‍ എസ്.പിയായി അദ്ദേഹത്തെ നിയമിച്ചു കൊണ്ടാണ് ആഭ്യന്തരവകുപ്പ് ഉത്തരവിറക്കിയത്. നിരവധി കേസുകള്‍ ശാസ്ത്രീയമായി തെളിയിച്ചു തളിപ്പറമ്പില്‍ എസ്. ഐയായും സി.ഐയായും പ്രവര്‍ത്തിച്ച പി.പി സദാനന്ദന്‍ സംസ്ഥാന പൊലീസ് സേനയിലെ മികച്ച അന്വേഷണഉദ്യോഗസ്ഥരിലൊരാളാണ്. അടുത്ത കാലത്ത്‌ കേരളത്തെ ഞെട്ടിച്ച കോടികളുടെ കണ്ണൂര്‍ മയക്കുമരുന്ന് കേസില്‍ നൈജീരിയന്‍ സ്വദേശിനിയുള്‍പ്പെടെയുള്ളവരെ പിടികൂടാന്‍ അദ്ദേഹം നേതൃത്വം നല്‍കിയ പ്രത്യേക അന്വേഷണ സംഘത്തിന് കഴിഞ്ഞു. നേരത്തെ എസ്.പിയായി നിയമിക്കാന്‍ സംസ്ഥാന സര്‍ക്കാര്‍ നിര്‍ദ്ദേശിച്ചിരുന്നുവെങ്കിലും തലശേരി ഫസല്‍ വധക്കേസില്‍ സി.ബി. ഐ കോടതിയില്‍ സമര്‍പ്പിച്ച റിപ്പോര്‍ട്ടിലുണ്ടായ പ്രതികൂല പരാമര്‍ശമാണ് ഐ.പി.എസ് ലഭിക്കുന്നതിന് തടസമായത്.

കണ്ണൂര്‍ ജില്ലയിലെ മറ്റൊരു അന്വേഷണ വിദഗ്ദ്ധനായ കണ്ണൂര്‍ സിറ്റി അഡീഷനല്‍ എസ്. പി പ്രിന്‍സ് എബ്രഹാമിനെ കണ്ണൂര്‍ റൂറല്‍ അഡീഷനല്‍ എസ്.പിയായും സ്ഥാനക്കയറ്റം നല്‍കി നിയമിച്ചിട്ടുണ്ട്.തലശേരി സെയ്ദാര്‍ പള്ളിയിലെ എന്‍.ഡി. എഫ് പ്രവര്‍ത്തകന്‍ ഫസല്‍ വധക്കേസില്‍ മൊഴി മാറ്റുന്നതിനും കേസ് വഴിതിരിച്ചുവിടുന്നതിനുമായി ആര്‍. എസ്. എസ് പ്രവര്‍ത്തകന്‍ കുപ്പി സുബീഷെന്ന ചെമ്പ്രയിലെ സുബീഷിനെ പിടികൂടി മൂന്നാം മുറയ്ക്കിരയാക്കിയെന്ന ആരോപണമുയര്‍ന്നതിനെ തുടര്‍ന്ന് സി.ബി. ഐ പ്രതികൂല പരാമര്‍ശം നടത്തിയതാണ് പ്രിന്‍സ് എബ്രഹാമിനും ഐ.പി. എസ് പദവി ലഭിക്കുന്നതിന് തടസമായത്. ബി.ജെ.പി പ്രവര്‍ത്തകരെ കള്ളക്കേസില്‍ കുടുക്കുന്നുവെന്നാരോപിച്ചു കണ്ണൂര്‍ ജില്ലയിലെ ബി.ജെ.പി നേതൃത്വവും ഇദ്ദേഹത്തിനെതിരെ പരസ്യമായി രംഗത്തുവന്നിരുന്നു. ഇതോടെയാണ് കേന്ദ്രസര്‍വീസില്‍ ഐ.പി. എസ് കാഡറെന്ന ബഹുമതി ലഭിക്കാതെ പോയത്.

### Related Links & Sources
- [Original Story Source](https://thaliparamba.truevisionnews.com/news/34180/pp-sadanandan-promotion)