---
title: "കണ്ണൂരിലെ മയക്കുമരുന്ന് കേസിൽ വീണ്ടും നൈജീരിയൻ വനിത ഉൾപ്പെടെ മൂന്നു പേർ  അറസ്റ്റിൽ"
english_title: "arrested again in a drug case in Kannur"
publisher: "thaliparambanews.in"
canonical_url: "https://thaliparamba.truevisionnews.com/news/33933/arrested-again-in-a-drug-case-in-kannur"
published_at: "2022-03-25T21:28:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/623de6a20b2ef_vac.jpg"
keywords: []
---

# കണ്ണൂരിലെ മയക്കുമരുന്ന് കേസിൽ വീണ്ടും നൈജീരിയൻ വനിത ഉൾപ്പെടെ മൂന്നു പേർ  അറസ്റ്റിൽ

> **Lead Summary:** **കണ്ണൂർ: **കണ്ണൂരിൽ നിന്നും ഒന്നര കോടിയിലേറെ രൂപയുടെ മയക്കുമരുന്നു പിടിച്ച കേസിൽ മൂന്നു പ്രതികളെ കൂടി അറസ്റ്റു ചെയ്തു. നൈജീരിയൻ അബൂജ സ്വദേശി പ്രയിസ് ഓട്ടോണിയേ യെന്ന യുവതിയെ ബെംഗളൂരു ബനസവാടിയിൽ വെച്ചു കണ്ണൂർ അസി. കമ്മീഷ്ണർ പി പി സദാനന്ദനാണ് അറസ്റ്റു ചെയ്തത്.

## Article Content

**കണ്ണൂർ: **കണ്ണൂരിൽ നിന്നും ഒന്നര കോടിയിലേറെ രൂപയുടെ മയക്കുമരുന്നു പിടിച്ച കേസിൽ മൂന്നു പ്രതികളെ കൂടി അറസ്റ്റു ചെയ്തു. നൈജീരിയൻ അബൂജ സ്വദേശി പ്രയിസ് ഓട്ടോണിയേ യെന്ന യുവതിയെ ബെംഗളൂരു ബനസവാടിയിൽ വെച്ചു കണ്ണൂർ അസി. കമ്മീഷ്ണർ പി പി സദാനന്ദനാണ് അറസ്റ്റു ചെയ്തത്.

കണ്ണൂർ സിറ്റി മരക്കാർക്കണ്ടിയിൽ ജനീസ് (30), അണ്ടത്തോട് അനുഗ്രഹയിൽ മുഹമ്മദ് ജാബിർ (30) എന്നിവരെയാണ് നർക്കോട്ടിക് സെൽ ഡിവൈഎസ്പി ജസ്റ്റിൻ എബ്രഹാം പിടികൂടിയത്.ഇതോടെ ഈ കേസിൽ അറസ്റ്റിലായവരുടെ എണ്ണം ഒൻപതായി.

രണ്ടുകിലോ എംഡിഎംഎ, കൊക്കൈയിൻ, എൽഎസ്ടി സ്റ്റാമ്പുകൾ തുടങ്ങിയ അത്യാധുനിക ലഹരി ഗുളികകൾ കണ്ണൂർ നഗരത്തിലെ രണ്ടിടങ്ങളിൽ നിന്നായി പിടികൂടിയ സംഭവത്തിലാണ് ഇവർക്കെതിരെ കേസെടുത്തത്.

മയക്കുമരുന്ന് മൊത്തവ്യാപാരം നടത്തിയ കണ്ണൂർ തെക്കിബസാർ സ്വദേശി നിസാമിന്റെ ബാങ്ക് രേഖകൾ പരിശോധിച്ചതിൽ നിന്നും രണ്ടുലക്ഷം രൂപവീതം ദിവസവും നൈജീരിയൻ സ്വദേശികളായ ഷിബുസോർ, അസിഫ ടി കെമി എന്നിവരുടെ അക്കൗണ്ടുകളിലേക്ക് ട്രാൻസ്ഫർ ചെയ്തതോടെയാണ് സംഭവത്തിന് പിന്നിൽ അന്താരാഷ്ട്ര മാഫിയ തന്നെ പ്രവർത്തിക്കുന്നതായി വ്യക്തമായത്.

കേസിലെ മുഖ്യപ്രതിയായ ജനീസിന്റെ അക്കൗണ്ടുകൾ പരിശോധിച്ചതിൽ ബെംഗളൂരു യൂണിയൻ ബാങ്കിൽ നൈജീരിയൻ സ്വദേശികളായ വിദ്യാർഥികളുടെ പേരിലാണ് പണം ട്രാൻസർ ചെയ്യുന്നതെന്നു വ്യക്തമാകുകയായിരുന്നു. ഇവർ താമസിക്കുന്ന ബെംഗളൂരു ബനസവാടിയിലെ വീട്ടിൽ അന്വേഷണം നടത്തിയതിൽ ഷിബു സോറും ആസിഫയും നൈജീരിയയിലേക്ക് മടങ്ങിയതായി മനസിലായി.

പ്രയിസ് എന്ന മറ്റൊരു പെൺകുട്ടി പഠനം പൂർത്തിയാകാത്തതിനാൽ അതെ വീട്ടിൽ താമസിക്കുന്നതായും മനസിലായി. പ്രയിസിന്റെ ബാങ്ക് അക്കൗണ്ട് പരിശോധിച്ചതിൽ ഓരോ മൂന്ന് ദിവസത്തിലും 30,000 മുതൽ 80,000 രൂപവരെ അവരുടെ അക്കൗണ്ടിൽ വരുന്നതായി പ്രത്യേക അന്വേഷണസംഘത്തിന് വ്യക്തമാകുകയായിരുന്നു. എന്നാൽ തനിക്ക് മയക്കുമരുന്ന് സംഘവുമായി ബന്ധമില്ലെന്നും നൈജീരിയൻ വിദ്യാർഥികൾക്ക് നൈജീരിയൻ കറൻസിയായ നേരക്ക് പകരം ഇന്ത്യൻ കറൻസിയായ ഇന്ത്യൻ രൂപ നൽകുന്ന ഹുണ്ടി ഇടപാടുണ്ടെന്നും പറഞ്ഞൊഴിയുകയായിരുന്നു.

എന്നാൽ പോലീസ് അവിടെ എത്തിയ സമയം അവരുടെ ഫോണിലെ മെസേജുകളും ശബ്ദ സന്ദേശങ്ങളും മായ്ച്ചു കളഞ്ഞതയും മനസിലാക്കി. ഡിലീറ്റ് ചെയ്ത സന്ദേസങ്ങളും ശബ്ദങ്ങളും സാങ്കേതിക വിദ്യയുടെ സഹായത്താൽ തിരിച്ചെടുത്തതോടെ മയക്കുമരുന്ന് വ്യാപാരിയുമായി പ്രയിസിന് നേരിട്ട് ബന്ധമുള്ളതായി വ്യക്തമാവുകയായിരുന്നു.

മയക്കുമരുന്ന് വ്യാപാരിയുമായി ബെംഗളൂരുവിലെ ഒരു ഷോപ്പിങ് മാളിൽ നിൽക്കുന്ന ഒരു ഫോട്ടോ കൂടി ഗൂഗിൾ ഡ്രൈവിൽ നിന്നും തിരിച്ചെടുത്തതോടെ ഇവരുടെ കള്ളക്കളി പുറത്തായി. അതോടെ അസിസ്റ്റന്റ് പോലീസ് കമ്മിഷണർ പി പി സദാനന്ദൻ ഇവരുടെ അറസ്റ്റ് രേഖപ്പെടുത്തുകയായിരുന്നു.

കണ്ണൂർ ചാലാട് ഇന്റീരിയർ ഷോപ്പു കേന്ദ്രീകരിച്ചു മയക്കുമരുന്ന് വിൽപന നടത്തിയതിനാണ് ജനീസിനെയും ജാബിറിനെയും അറസ്റ്റ് ചെയ്തത്. ഇവർ നേരത്തെ ഗോവയിൽ ഉണ്ടെന്നു മനസിലാക്കിയ പോലീസ് അവിടെയും അന്വേഷണം നടത്തിയിരുന്നു. അസി. പോലീസ് കമ്മിഷണർ സദാനന്ദനു പുറമെ എഎസ്ഐ ചന്ദ്രശേഖരൻ, സിദ്ധിഖ്, എസ്ഐ മഹിജൻ, റാഫി, എടക്കാട് എസ്ഐ മഹേഷ് കണ്ടമ്പേത്ത്, കണ്ണപുരം എസ്ഐ വിനീഷ് എന്നിവരും സംഘത്തിലുണ്ടായിരുന്നു.

### Related Links & Sources
- [Original Story Source](https://thaliparamba.truevisionnews.com/news/33933/arrested-again-in-a-drug-case-in-kannur)