---
title: "ഭാര്യ ഭർത്താക്കൻമാർ തമ്മിലുള്ള തർക്കം ആക്രമണത്തിലേക്ക്: ജില്ലയിൽ രണ്ടിടത്തായി രണ്ട് കേസുകൾ"
english_title: "husbant and wife clash"
publisher: "thaliparambanews.in"
canonical_url: "https://thaliparamba.truevisionnews.com/news/32528/husbant-and-wife-clash"
published_at: "2022-03-18T16:03:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/62345ffa1b85d_Untitled-2 web-Recovered.jpg"
keywords: []
---

# ഭാര്യ ഭർത്താക്കൻമാർ തമ്മിലുള്ള തർക്കം ആക്രമണത്തിലേക്ക്: ജില്ലയിൽ രണ്ടിടത്തായി രണ്ട് കേസുകൾ

> **Lead Summary:** കണ്ണൂരിൽ ഭാര്യാ-ഭർത്താക്കന്മാർ തമ്മിലുള്ള പിണക്കവും വൈരാഗ്യവും അക്രമത്തിൽ കലാശിക്കുന്നു. രണ്ടു വ്യത്യസ്ത സംഭവങ്ങളിലായി കോപാകുലരായ ഭർത്താക്കന്മാർ കാർ അടിച്ചു തകർക്കുകയും കട കത്തിക്കുകയും ചെയ്തു. ഭാര്യയുമായി പിണക്കത്തിൽ കഴിയവെ രാത്രിയിൽ മദ്യലഹരിയിൽ ഭാര്യവീട്ടിലെത്തി കത്തികാണിച്ചു ഭീഷണിപ്പെടുത്തി കാർ തകർത്തതിനു പ്രവാസിക്കെതിരെ മയ്യിൽ പോലിസ് കേസെടുത്തിട്ടുണ്ട്.

## Article Content

കണ്ണൂരിൽ ഭാര്യാ-ഭർത്താക്കന്മാർ തമ്മിലുള്ള പിണക്കവും വൈരാഗ്യവും അക്രമത്തിൽ കലാശിക്കുന്നു. രണ്ടു വ്യത്യസ്ത സംഭവങ്ങളിലായി കോപാകുലരായ ഭർത്താക്കന്മാർ കാർ അടിച്ചു തകർക്കുകയും കട കത്തിക്കുകയും ചെയ്തു. ഭാര്യയുമായി പിണക്കത്തിൽ കഴിയവെ രാത്രിയിൽ മദ്യലഹരിയിൽ ഭാര്യവീട്ടിലെത്തി കത്തികാണിച്ചു ഭീഷണിപ്പെടുത്തി കാർ തകർത്തതിനു പ്രവാസിക്കെതിരെ മയ്യിൽ പോലിസ് കേസെടുത്തിട്ടുണ്ട്.

മയ്യിൽ ചേലെരിമുക്ക് സ്വദേശിനി പാലക്കൽ വീട്ടിൽ ലിജിന (36) യുടെ പരാതിയിലാണ് ഭർത്താവ് ഷാമേജിനെ (43) തിരെ കേസെടുത്തത്. ലിജിനയുടെ സഹോദരൻ്റെ പോർച്ചിൽ നിർത്തിയിട്ട കാറാണ് ഇയാൾ തകർത്തത്. ഒരാഴ്ച മുൻപാണ് പ്രവാസി നാട്ടിലെത്തിയത്. കഴിഞ്ഞ 14 ന് രാവിലെ 11 മണിയോടെ മദ്യലഹരിയിൽ കത്തിയുമായി തൻ്റെ വീട്ടിലെത്തിയ ഭർത്താവ് കത്തിവീശി തന്നെയും കുടുംബാംഗങ്ങളെയും ഭീഷണിപ്പെടുത്തിയതിനു ശേഷം പോർച്ചിൽ നിർത്തിയിട്ട കാർ തകർത്തുവെന്നാണ് യുവതിയുടെ പരാതി.

അഞ്ചുവർഷക്കാലമായി ഇരുവരും അകന്നുകഴിയുകയായിരുന്നു. ഗൾഫിൽ നിന്നെത്തിയ ഇയാൾ ഭാര്യയെ സ്വന്തം വീട്ടിൽ കൂട്ടിക്കൊണ്ടുപോകാൻ ശ്രമിച്ചിരുന്നുവെങ്കിലും കുടുംബാംഗങ്ങളുടെ എതിർപ്പുകാരണം നടന്നിരുന്നില്ല. ഈ വൈരാഗ്യത്തിലാണ് സഹോദരൻ്റെ കാർ തകർത്തതെന്നാണ് പോലീസ് അന്വേഷണത്തിൽ വ്യക്തമായത്. മയ്യിൽ പോലീസ് കേസെടുത്ത് അന്വേഷണം ഊർജ്ജിതമാക്കിയിട്ടുണ്ട്.

> ഇതിനു സമാനമായി ആലക്കോട് യുവതിയുടെ തയ്യൽ കടയ്ക്ക് ഭർത്താവ് തീയിട്ടു. ആലക്കോട് ടൗണിൽ ടെയ്ലറിങ് ഷോപ്പ് നടത്തുകയായിരുന്ന ലിഗയുടെ ഷോപ്പാണ് ഭർത്താവ് അഗ്നിക്കിരയാക്കിയത്. ഫോണിൽ വിളിച്ച് അറിയിച്ച ശേഷമാണ് കടയ്ക്ക് തീ കൊളുത്തിയതെന്ന് നാട്ടുകാർ പറഞ്ഞു. കടയിൽ ഉണ്ടായിരുന്ന തുണികളിൽ 90 ശതമാനം കത്തിനശിച്ചു. "ഞാൻ നിൻ്റെ കട കത്തിക്കുകയാണെ"ന്ന് വിളിച്ചു പറഞ്ഞ ശേഷമാണ് ലിഗയുടെ ഭർത്താവ് രാത്രിയുടെ മറവിൽ കട കത്തിച്ചത്.

ലോണെടുത്ത് തുടങ്ങിയതാണ് കട. സ്കൂൾ തുറന്നതോടെ യൂണിഫോം അടക്കമുള്ള നിരവധി വസ്ത്രങ്ങളാണ് കത്തിനശിച്ചത്. പോലീസ് കേസെടുത്ത് അന്വേഷണമാരംഭിച്ചിട്ടുണ്ട്. കൊവിഡാനന്തരം നിരവധി അക്രമ കേസുകളാണ് ദമ്പതികൾ തമ്മിലുള്ള കുടുംബപ്രശ്നത്തിൻ്റെ പേരിൽ റിപ്പോർട്ടു ചെയ്യുന്നതെന്നാണ് പോലീസ് പറയുന്നത്.

### Related Links & Sources
- [Original Story Source](https://thaliparamba.truevisionnews.com/news/32528/husbant-and-wife-clash)