---
title: "ചൊറുക്കള -ബാവുപ്പറമ്പ്–മയ്യിൽ-കോളോളം-മട്ടന്നൂർ എയർപോർട്ട് ലിങ്ക് റോഡിനുള്ള ഭൂമി ഏറ്റെടുക്കാൻ 73.9 കോടി രൂപ കിഫ്‌ബി അനുവദിച്ചു"
english_title: "Kifbi "
publisher: "thaliparambanews.in"
canonical_url: "https://thaliparamba.truevisionnews.com/news/316441/kifbi"
published_at: "2025-09-22T21:41:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/"
keywords: []
---

# ചൊറുക്കള -ബാവുപ്പറമ്പ്–മയ്യിൽ-കോളോളം-മട്ടന്നൂർ എയർപോർട്ട് ലിങ്ക് റോഡിനുള്ള ഭൂമി ഏറ്റെടുക്കാൻ 73.9 കോടി രൂപ കിഫ്‌ബി അനുവദിച്ചു

> **Lead Summary:** ജില്ലയിലെ ഏറ്റവും പ്രധാന റോഡായ ചൊറുക്കള -–ബാവുപ്പറമ്പ്– -മയ്യിൽ-–കോളോളം –മട്ടന്നൂർ എയർപോർട്ട് ലിങ്ക് റോഡിനുള്ള ഭൂമി ഏറ്റെടുക്കാൻ 73.9 കോടി രൂപ കിഫ്‌ബി അനുവദിച്ചു. കിഫ്‌ബി ഉന്നത ഉദ്യോഗസ്ഥരുമായി എം വി ഗോവിന്ദൻ മാസ്റ്റർ എംഎൽഎ നടത്തിയ ചർച്ചയെ തുടർന്നാണ് തുക അനുവദിച്ച്‌ ഉത്തരവായത്‌. 1600 ഭൂവുടമകളുടെ ഏഴ്‌ ഹെക്ടർ ഭൂമിയാണ്‌ റോഡ്‌ വികസനത്തിന്‌ ഏറ്റെടുക്കേണ്ടിവരിക. ഇതിന്റെ ഭാഗമായ 19 വിജ്ഞാപനം അടുത്ത ദിവസം പുറത്തിറങ്ങും .

## Article Content

ജില്ലയിലെ ഏറ്റവും പ്രധാന റോഡായ ചൊറുക്കള -–ബാവുപ്പറമ്പ്– -മയ്യിൽ-–കോളോളം –മട്ടന്നൂർ എയർപോർട്ട് ലിങ്ക് റോഡിനുള്ള ഭൂമി ഏറ്റെടുക്കാൻ 73.9 കോടി രൂപ കിഫ്‌ബി അനുവദിച്ചു. കിഫ്‌ബി ഉന്നത ഉദ്യോഗസ്ഥരുമായി എം വി ഗോവിന്ദൻ മാസ്റ്റർ എംഎൽഎ നടത്തിയ ചർച്ചയെ തുടർന്നാണ് തുക അനുവദിച്ച്‌ ഉത്തരവായത്‌. 1600 ഭൂവുടമകളുടെ ഏഴ്‌ ഹെക്ടർ ഭൂമിയാണ്‌ റോഡ്‌ വികസനത്തിന്‌ ഏറ്റെടുക്കേണ്ടിവരിക. ഇതിന്റെ ഭാഗമായ 19 വിജ്ഞാപനം അടുത്ത ദിവസം പുറത്തിറങ്ങും .

ജില്ലാകലക്ടർ വിജ്ഞാപനമിറക്കുന്നതോടെ സ്ഥലത്തിന്റെ രേഖകൾ പരിശോധിച്ച് പണം ഭൂവുടമകളുടെ ബാങ്ക്‌ അക്കൗണ്ടുകളിലേക്ക്‌ നൽകും. ഇതോടൊപ്പം റോഡ്‌ നിർമാണത്തിനാവശ്യമായ 231 കോടി രൂപ അനുവദിക്കാനുള്ള നടപടിയും അന്തിമഘട്ടത്തിലാണ്.  

തളിപ്പറമ്പ - ശ്രീകണ്ഠാപുരം സംസ്ഥാന പാതയിൽ ചൊർക്കള നിന്ന് ആരംഭിക്കുന്ന റോഡ് 22.5 കിലോമീറ്ററിലാണ്‌ നവീകരിക്കുക. വൈദ്യുതുതൂണുകളും ജലഅതോറിറ്റിയുടെ കുടിവെള്ള കണക്‌ഷനുകളുടെ പൈപ്പുകൾ ഉൾപ്പെടെ മാറ്റി സ്ഥാപിച്ചുകൊണ്ടാകും റോഡ്‌ നിർമാണ പ്രവൃത്തി നടത്തുക. ഇതുൾപ്പെയുള്ള വൈദ്യുതി ബോർഡിന്റെയും ജലഅതോറിറ്റിയുടെയും യൂട്ടീലിറ്റി ഷിഫ്റ്റിംഗ് അടക്കമുള്ള‌ പ്രവൃത്തികൾക്കാണ് 231കോടിരൂപ അനുവദിച്ചത്‌.  

കാസർകോട്‌ ജില്ലയുടെ വിവിധ ഭാഗങ്ങളിൽനിന്നുള്ളവരും കണ്ണൂരിലെ മലയോരമേഖലകളായ ആലക്കോട്‌, കുടിയാന്മല, ചപ്പാരപ്പടവ്‌, ചെറുപുഴ , പുളിങ്ങോം ഭാഗത്തുള്ളവർക്കും മലയോര ഹൈവേ വഴി വന്നാൽ എളുപ്പത്തിൽ വിമാനതാവളത്തിലേക്ക്‌ എത്തിച്ചേരാവുന്ന വഴിയാണിത്‌. തളിപ്പറമ്പ്‌ –മണക്കടവ്‌– കൂർഗ്‌ റോഡിന്റെ ഭാഗമയ കാഞ്ഞിരങ്ങാട്‌ നിന്നും ഇ‍ൗ റോഡിലേക്ക്‌ പ്രവേശിക്കാമെന്നതും യാത്രക്കാർക്ക്‌ ഏറെ ഉപകാരപ്രദമാകും. 69 കോടി രൂപ ചിലവിട്ട് നവീകരണ പ്രവൃത്തി നടക്കുന്ന ഇടിസി- പൂമംഗലം – മഴൂർ– പന്നിയൂർ റോഡുവഴി നടുവിൽ ആലക്കോട്‌, ഭാഗത്തുള്ളവർക്കും ഇ‍ൗ റോഡിലേക്ക്‌ എളുപ്പത്തിൽ പ്രവേശിക്കാനാകും. എയർപോർട്‌ ലിങ്ക്‌ റോഡുമായി ബന്ധിപ്പിക്കുന്ന പൂമംഗലം കൊടിലേരി പാലത്തിന്റെ അപ്രോച്ച്‌ റോഡ്‌ പണിയും അവസാനഘട്ടത്തിലാണ്‌ .

ഇതോടെ മലയോരത്തുള്ളവർക്ക്‌ എയർപോർട്‌ ലിങ്ക്‌റോഡിലേക്ക്‌ എളുപ്പത്തിൽ ചേരാൻ കഴിയും. വിമാനതാവളയാത്രക്കാർക്ക്‌ പുറമെ പ്രധാന തീർഘാടന വിനോദസഞ്ചാരകേന്ദ്രമായ പറശ്ശിനിക്കടവിലേക്കും എളുപ്പത്തിൽ എത്തിച്ചേരാൻ കഴിയുമെന്നതും ഇ‍ൗ റോഡിന്റെ പ്രധാന്യം വർധിപ്പിക്കുന്നു.   

വിനോദ സഞ്ചാരമേഖലയിലും അടിസ്ഥാനസൗകര്യ വികസന മേഖലയിലും സമാനതകളില്ലാത്ത മുന്നേറ്റം നടന്നു കൊണ്ടിരിക്കുന്ന കണ്ണൂർ ജില്ലയ്‌ക്ക്‌ ഏറെ ആനന്ദം പകരുന്നതാണ്‌ ചൊറുക്കള -–ബാവുപ്പറമ്പ്– -മയ്യിൽ-–കോളോളം –മട്ടന്നൂർ എയർപോർട്ട് ലിങ്ക് റോഡിന്‌ ഭൂമി ഏറ്റെടുക്കാൻ തുക അനുവദിച്ച നടപടി. ഇതോടെ ഈ പ്രവൃത്തിയുടെ സുപ്രധാന കടമ്പ പൂർത്തിയായിരിക്കുകയാണ്.

ടെണ്ടർ നടപടി പൂർത്തിയാക്കി എത്രയും വേഗം റോഡ്‌ നവീകരിക്കാനാണ് ശ്രമിക്കുന്നതെന്ന് എം വിഗോവിന്ദൻ മാസ്റ്റർ എം എൽ എ പറഞ്ഞു. സൂ–സഫാരി പാർക്കും തെയ്യം മ്യൂസിയവും കരിമ്പം ഫാം ടൂറിസമുൾപ്പടെയുള്ള നാടിന്റെ മുഖചായ തന്നെ മാറുന്ന വികസനത്തിനൊപ്പം ചേർത്തുവയ്‌ക്കാവുന്ന പ്രവർത്തിക്കാണ് എയർപോർട്‌ ലിങ്ക്‌ റോഡിലൂടെ തുടക്കം കുറിക്കുന്നതെന്നും എം എൽ എ അഭിപ്രായപ്പെട്ടു .

### Related Links & Sources
- [Original Story Source](https://thaliparamba.truevisionnews.com/news/316441/kifbi)