---
title: "ഓൺലൈൻ വായ്പയെടുത്ത് വലയിലായി: തലശ്ശേരി സ്വദേശി ആത്മഹത്യ ചെയ്തു"
english_title: "suiside due to online loan"
publisher: "thaliparambanews.in"
canonical_url: "https://thaliparamba.truevisionnews.com/news/23089/suiside-due-to-online-loan"
published_at: "2022-01-28T13:15:00+05:30"
category: "Obituary"
language: "ml"
image: "https://cf.zdn.im/img/truevisionnews.com/0/image-uploads/61f39fa0456bc_download.jpg"
keywords: []
---

# ഓൺലൈൻ വായ്പയെടുത്ത് വലയിലായി: തലശ്ശേരി സ്വദേശി ആത്മഹത്യ ചെയ്തു

> **Lead Summary:** **തലശേരി; ** തിരിച്ചടവ് വൈകിയാൽ ഇത്തരം ഓൺലൈൻ ധനകാര്യസ്ഥാപനങ്ങൾ ഫോണുകൾ ഹാക്ക് ചെയ്യുകയും ഇടപാടുകാരെ അപകീർത്തിപ്പെടുത്തുകയും ചെയ്യുന്നതായും കണ്ടെത്തിയിട്ടുണ്ട്. ഓണ്‍ലൈന്‍ ധനകാര്യസ്ഥാപനത്തിന്‍റെ കെണിയില്‍ കുടുങ്ങി കണ്ണൂര്‍ സ്വദേശിയായ യുവാവിനാണ് ഒടുവിൽ ദാരുണാന്ത്യം സംഭവിച്ചിരിക്കുന്നത്.

## Article Content

**തലശേരി; ** തിരിച്ചടവ് വൈകിയാൽ ഇത്തരം ഓൺലൈൻ ധനകാര്യസ്ഥാപനങ്ങൾ ഫോണുകൾ ഹാക്ക് ചെയ്യുകയും ഇടപാടുകാരെ അപകീർത്തിപ്പെടുത്തുകയും ചെയ്യുന്നതായും കണ്ടെത്തിയിട്ടുണ്ട്. ഓണ്‍ലൈന്‍ ധനകാര്യസ്ഥാപനത്തിന്‍റെ കെണിയില്‍ കുടുങ്ങി കണ്ണൂര്‍ സ്വദേശിയായ യുവാവിനാണ് ഒടുവിൽ ദാരുണാന്ത്യം സംഭവിച്ചിരിക്കുന്നത്.

ഓണ്‍ലൈന്‍ ധനകാര്യസ്ഥാപനത്തിന്‍റെ കെണിയില്‍ കുടുങ്ങി കണ്ണൂര്‍ സ്വദേശിയായ യുവാവിന് ദാരുണാന്ത്യം. നേരത്തെ ഓണ്‍ലൈന്‍ ഗെയിം കളിച്ചു ധര്‍മടം പാലയാട് പ്ലസ് ടൂ വിദ്യാര്‍ത്ഥി മരിച്ചതിനു പിന്നാലെയാണ് കണ്ണൂരിനെ തേടി മറ്റൊരു ദുരന്തം കൂടിയെത്തിയത്.

ഓണ്‍ലൈന്‍ ധനകാര്യസ്ഥാപനത്തിന്റെ വലയില്‍ വീണ് വായ്പയെടുത്ത പൂനെയിലെ പെട്രോള്‍ പമ്പ് ജീവനക്കാരനായ കണ്ണൂര്‍ തലശേരിക്കടുത്തെ ധര്‍മടം അണ്ടല്ലൂരിലെ യുവാവാണ് വ്യാഴാഴ്ച്ച രാവിലെ ഏഴുമണിയോടെ ജോലി സ്ഥലത്തെ മുറിയില്‍ ജീവനൊടുക്കിയത്.

സംഭവത്തില്‍ ദുരൂഹതയുണ്ടെന്ന് കാണിച്ച് ബന്ധുക്കള്‍ നല്‍കിയ പരാതിയില്‍ ധര്‍മടം പോലീസ് അന്വേഷണമാരംഭിച്ചിട്ടുണ്ട്. തലശ്ശേരി അണ്ടലൂര്‍ സ്വദേശിയായ യുവാവാണ് വ്യാഴാഴ്ച്ച രാവിലെ ഏഴുമണിയോടെ മഹാരാഷ്ട്രയിലെ പൂനെയില്‍ ജീവനൊടുക്കിയത്.

അണ്ടല്ലൂരിലെ അനിതാലയത്തില്‍ പ്രകാശന്‍-അനിത ദമ്പതികളുടെ മകന്‍ അനുഗ്രഹാ(22)ണ് മരിച്ചത്. 8000 രൂപയാണ് യുവാവ് ഓണ്‍ലൈന്‍ വായ്പയെടുത്തത്. ഇതിനു ശേഷം കമ്പിനി അധികൃതര്‍ യുവാവിന്റെ ഫോട്ടോ മോര്‍ഫ് ചെയ്ത് സുഹൃത്തുക്കള്‍ക്ക് അയച്ചുകൊടുക്കുകയായിരുന്നു.

വായ്പാ വിവരം യുവാവിന്‍റെ ഫോണ്‍ നമ്പറിലേക്കും നിരന്തരം അയച്ചു. ഇതിന്റെ സംഘര്‍ഷത്തിലാണ് അനുഗ്രഹ് ജീവനൊടുക്കിയതെന്നാണ് സഹപ്രവര്‍ത്തകരും ബന്ധുക്കളും ആരോപിക്കുന്നത്. മഹാരാഷ്ട പോലീസ് സൈബര്‍ സെല്ലും അന്വേഷണം തുടങ്ങിയിട്ടുണ്ട്.

ധര്‍മടം പോലീസ് സ്റ്റേഷന്‍ പരിധിയില്‍ ഉള്‍പ്പെടുന്ന സ്ഥലമാണ് അണ്ടല്ലൂര്‍. പൂനെ പോലീസ് യുവാവ് ജീവനൊടുക്കിയ വിവരം ധര്‍മടം പോലീസിനെയാണ് ആദ്യം അറിയിച്ചത്. ഇതിനെ തുടര്‍ന്നാണ് ബന്ധുക്കളെ വിവരമറിയിക്കുന്നത്. സംഭവത്തിന്റെ വിശദവിവരങ്ങള്‍ പോലീസ് അന്വേഷിച്ചു വരികയാണ്. അനുഗ്രഹിന്റെ മൃതദേഹം പോസ്റ്റുമോര്‍ട്ടത്തിനു ശേഷം സംസ്‌കരിക്കാനായി നാട്ടിലേക്ക് കൊണ്ടുവരുമെന്ന് ബന്ധുക്കള്‍ അറിയിച്ചു.

### Related Links & Sources
- [Original Story Source](https://thaliparamba.truevisionnews.com/news/23089/suiside-due-to-online-loan)