---
title: "#PuthuppalliElection ഉമ്മന്‍ ചാണ്ടിയുടെ കുടുംബത്തില്‍ നിന്നാണ് സ്ഥാനാര്‍ഥി എന്ന് പറഞ്ഞില്ല; കുടുംബവുമായി ആലോചിക്കും എന്നാണ് പറഞ്ഞത്; 'പുതുപ്പള്ളി'യില്‍ മലക്കം മറിഞ്ഞ് സുധാകരന്‍"
english_title: "Puthuppalli_Election"
publisher: "thaliparambanews.in"
canonical_url: "https://thaliparamba.truevisionnews.com/news/133045/puthuppalli_election"
published_at: "2023-07-23T18:35:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/64bd25b80b372_images.jpeg"
keywords: []
---

# #PuthuppalliElection ഉമ്മന്‍ ചാണ്ടിയുടെ കുടുംബത്തില്‍ നിന്നാണ് സ്ഥാനാര്‍ഥി എന്ന് പറഞ്ഞില്ല; കുടുംബവുമായി ആലോചിക്കും എന്നാണ് പറഞ്ഞത്; 'പുതുപ്പള്ളി'യില്‍ മലക്കം മറിഞ്ഞ് സുധാകരന്‍

> **Lead Summary:** പുതുപ്പള്ളിയിലെ സ്ഥാനാര്‍ഥി നിര്‍ണയത്തില്‍ പറഞ്ഞത് മാറ്റിപ്പറഞ്ഞു കെപിസിസി അധ്യക്ഷന്‍ കെ.സുധാകരന്‍. പുതുപ്പള്ളിയിലെ സ്ഥാനാര്‍ഥി ഉമ്മന്‍ചാണ്ടിയുടെ കുടുംബത്തില്‍ നിന്ന് തന്നെയാകുമെന്നും മകനാണോ സ്ഥാനാര്‍ഥി മകളാണോ സ്ഥാനാര്‍ഥി എന്ന് കുടുംബം തീരുമാനിക്കട്ടെ എന്നാണ് സുധാകരന്‍ പറഞ്ഞിരുന്നത്.

## Article Content

പുതുപ്പള്ളിയിലെ സ്ഥാനാര്‍ഥി നിര്‍ണയത്തില്‍ പറഞ്ഞത് മാറ്റിപ്പറഞ്ഞു കെപിസിസി അധ്യക്ഷന്‍ കെ.സുധാകരന്‍. പുതുപ്പള്ളിയിലെ സ്ഥാനാര്‍ഥി ഉമ്മന്‍ചാണ്ടിയുടെ കുടുംബത്തില്‍ നിന്ന് തന്നെയാകുമെന്നും മകനാണോ സ്ഥാനാര്‍ഥി മകളാണോ സ്ഥാനാര്‍ഥി എന്ന് കുടുംബം തീരുമാനിക്കട്ടെ എന്നാണ് സുധാകരന്‍ പറഞ്ഞിരുന്നത്.

പുതുപ്പള്ളിയില്‍ നടക്കുന്ന ഉപതിരഞ്ഞെടുപ്പില്‍ ഇടതുമുന്നണി സ്ഥാനാര്‍ഥിയെ നിര്‍ത്താതെ ആദരവ് കാണിക്കണമെന്നും സുധാകരന്‍ പറഞ്ഞിരുന്നു. ഈ വാക്കുകളാണ് ഉടന്‍ തന്നെ കെപിസിസി അധ്യക്ഷന്‍ മാറ്റി പറഞ്ഞത്. പാര്‍ട്ടിയിലെ കൂടിയാലോചനകള്‍ക്ക് മുമ്പ് സുധാകരന്‍ സ്ഥാനാര്‍ഥി നിര്‍ണയം നടത്തിയതില്‍ ചില നേതാക്കള്‍ അതൃപ്തി പ്രകടിപ്പിച്ചതോടെയാണ് സുധാകരന്റെ മലക്കം മറിച്ചില്‍ എന്നാണ് സൂചന.

ദേശീയ നേതൃത്വവുമായി ചര്‍ച്ച ചെയ്യാതെ തീരുമാനം പ്രഖ്യാപിച്ചതോടെയാണ് കെപിസിസി അധ്യക്ഷന്‍ വെട്ടിലായത്. ഉടന്‍ തന്നെ കെപിസിസി ഓഫീസില്‍ നിന്നും മാധ്യമങ്ങള്‍ക്ക് വിശദീകരണം നല്‍കുകയായിരുന്നു. ഉമ്മന്‍ ചാണ്ടിയുടെ കുടുംബത്തില്‍ നിന്നാണ് സ്ഥാനാര്‍ഥി എന്ന് പറയുകയായിരുന്നില്ല.

സ്ഥാനാര്‍ഥിയെ തീരുമാനിക്കുമ്പോള്‍ ഉമ്മന്‍ ചാണ്ടിയുടെ കുടുംബവുമായും ആലോചിക്കും എന്നാണ് ഉദ്ദേശിച്ചത്. കെ.സുധാകരന്‍ വാര്‍ത്താ കുറിപ്പില്‍ വ്യക്തമാക്കി. സ്ഥാനാര്‍ഥി നിര്‍ണയം സംബന്ധിച്ച് ഒരു ചര്‍ച്ചയും പാര്‍ട്ടിയില്‍ നടന്നിട്ടില്ല. ഈ സാഹചര്യത്തില്‍ തെറ്റിദ്ധാരണ പരത്തുന്ന വാര്‍ത്തകള്‍ മാധ്യമങ്ങള്‍ നല്‍കരുത് എന്നാണ് സുധാകരന്റെ അഭ്യര്‍ഥന.

'സ്ഥാനാര്‍ഥി ആരാണ് എന്ന ചോദ്യം മാധ്യമങ്ങളില്‍ നിന്നുണ്ടായി. ഉമ്മന്‍ ചാണ്ടിയുടെ കുടുംബത്തില്‍ നിന്ന് ആകുമോ സ്ഥാനാര്‍ഥി എന്ന ചോദ്യത്തിന് അതും പരിഗണിക്കും എന്നാണ് താന്‍ ഉദ്ദേശിച്ചത്. സ്ഥാനാര്‍ഥി ആര് എന്നതില്‍ ഒരു തര്‍ക്കവും പാര്‍ട്ടിയില്‍ ഉണ്ടാകില്ല എന്നാണ് താന്‍ വ്യക്തമാക്കിയത്.

സ്ഥാനാര്‍ഥി നിര്‍ണ്ണയം സംബന്ധിച്ച് ഒരു ചര്‍ച്ചയും പാര്‍ട്ടിയില്‍ നടന്നിട്ടില്ല. വിശദീകരണ കുറിപ്പില്‍ സുധാകരന്‍ വ്യക്തമാക്കുന്നു.

### Related Links & Sources
- [Original Story Source](https://thaliparamba.truevisionnews.com/news/133045/puthuppalli_election)